Arrestohet në Greqi një bankier shqiptar i mafies së drogës

Policia greke dhe Europol njoftuan arrestimin e një biznesmeni 52-vjeçar në Glyfada, një periferi e Athinës jugore. Ai dyshohet për pastrim parash për një bandë ndërkombëtare droge.

Ndaj një shqiptari me emër dhe pasaportë greke është lëshuar një urdhër arresti europian. Në tekstin e urdhrit thuhet se ai është lëshuar në lidhje me akuzën e të dyshuarit në drejtimin e një organizate kriminale që grumbullonte shuma të mëdha parash nga tregtia e drogës.

Biznesmeni u zbulua dhe u arrestua në një operacion pas disa muajsh bashkëpunimi mes departamentit kundër narkotikëve të SDOE-së Attica dhe autoriteteve përkatëse holandeze më 31 maj në zonën metropolitane të Glyfadës.

Në një deklaratë, Europol vuri në dukje se sekuestrimi i fundit i tre mjeteve të komunikimit të koduar të përdorura nga kriminelët – Encrochat, Sky ECC dhe ANOM – tregoi rëndësinë e këtyre bankierëve të nëndheshëm dhe peizazhit të tyre kriminal.

Agjencia Evropiane e Policisë e quajti njeriun “një nga bankierët më të mëdhenj të fshehtë të Evropës”. Ai kërkohej me një urdhër-arresti evropian si një nga drejtuesit e një organizate kriminale të përfshirë në grumbullimin dhe shpërndarjen e shumave të mëdha të parave të marra nga tregtia e drogës në Holandë.

Organizata kriminale lëvizte shuma të mëdha parash droge, të vlerësuara në 250 milionë euro, çdo ditë përmes sistemit bankar “nëntokësor” duke përdorur komunikime të koduara për rreth 10 muaj, raportojnë mediat greke.

Gjatë kontrollit të kryer në vendin e banimit të të arrestuarit janë gjetur dhe sekuestruar kartëmonedha të shteteve të ndryshme, mes të cilave euro, dollarë amerikanë, dollarë kanadezë, dollarë australianë, franga zvicerane, lira turke, dirhemë të Emirateve të Bashkuara Arabe dhe randë të Afrikës së Jugut.

Gjithashtu u konfiskuan telefona celularë, përfshirë ato të përdorura për biseda të koduara përmes aplikacioneve speciale, një tabletë, një disk dixhital dhe karta SIM.

Drejtimi operacional i SDOE Attica vijon bashkëpunimin me autoritetet përkatëse të Holandës dhe me autoritetet gjyqësore kompetente të vendit, pasi ka dyshime të arsyeshme për pastrim parash nga aktivitete kriminale në Greqi.

Për të mbuluar aktivitetet e tij, i arrestuari ka hapur një biznes pronash në zonë, raportojnë mediat greke. Sipas disa mediave, ai është bankier i mafies shqiptare të drogës.

Source link